સાંસદોએ 5 વર્ષમાં MPLADનું અડધું ફંડ વાપર્યુ:ગુજરાતના 26 MPsએ ફંડના 440 કરોડમાંથી માત્ર 220 કરોડ વાપર્યા, આચારસંહિતાને પગલે હાલ બાકીનું વાપરી ન શકે

MP લોકલ એરિયા ડેવલપમેન્ટ ફંડ (MPLAD)ના ગુજરાતના 26 MPના હસ્તક 17 કરોડ લેખે 442 કરોડ રૂપિયા હતા. જે તેઓ તેમના મતક્ષેત્રમાં એવા કામો માટે વાપરી શકતા હતાં. પણ 26 સાંસદોએ માત્ર 354.99 કરોડ રૂપિયાના કામોની ભલામણ કરી હતી. તે પૈકી 263.15 કરોડના કામો મંજૂર કરવામાં આવ્યા હતા અને કુલ 220 કરોડ રૂપિયા ફાળવવામાં આવ્યા હતા, જે કુલ મળવાપાત્ર ફંડના માત્ર 49.77% થાય છે. આ રિપોર્ટ એસોસિએશન ફોર ડેમોક્રેટિક રિફોર્મ (ADR)દ્વારા એનાલિસિસ કરીને જાહેર કરવામાં આપ્યો છે. નોંધનીય બાબત એ છે, MPLAD ફંડ જે તે નાણાકીય વર્ષમાં જ વાપરવું જરૂરી હોતું નથી. પણ વણવપરાયેલું બીજા વર્ષમાં વાપરી શકાય છે. હવે ચૂંટણી જાહેર થવાથી ચૂંટણી પંચના સૂચનથી MPLAD વપરાશ પર રોક લગાવવામાં આવી છે. કોરોના કાળમાં 1.5 વર્ષ યોજના ફ્રીઝ કરાઈ
2019થી 2024ની ટર્મની વાત કરીએ તો આ વખતે MPLAD ફંડમાં ઘટાડો થયો છે. કોવિડ કાળ દરમિયાન લગભગ 1.5 વર્ષના સમયગાળા માટે આ યોજના ફ્રીઝ કરવામાં આવી હતી. તેથી આ 5 વર્ષ માટે દરેક સાંસદ પાસે 25 કરોડના બદલામાં માત્ર 17 કરોડ રૂપિયાની જોગવાઈ કરવામાં આવી હતી. MPLAD શું છે?
23 ડિસેમ્બર 1993ના રોજ MPLAD યોજના અમલમાં મૂકવામાં આવી હતી. આ યોજના અંતર્ગત દરેક સંસદ સભ્ય તેમના મત વિસ્તારના વિશેષ પ્રકારના કામોની ભલામણ કરી શકે, સંસદ સભ્યના ભલામણ બાદ જિલ્લા આયોજન મંડળ દ્વારા તે કામો માટે ભંડોળ ફાળવવામાં આવે છે. શરૂઆતમાં આ યોજનામાં સાંસદ દીઠ માત્ર 5 લાખ રૂપિયા ફાળવવામાં આવ્યા હતા. જે 1994-95 માં વધારીને 1 કરોડ કરવામાં આવ્યા. ત્યારબાદ સમય સમય પર રકમમાં વધારો થયો હતો, અત્યારે સાંસદ દીઠ દર વર્ષે 5 કરોડ રૂપિયા ફાળવવામાં આવે છે. દરેક સાંસદ તેમના 5 વર્ષના સમયગાળા દરમિયાન કુલ 25 કરોડના કામોની ભલામણ કરી શકે છે. MPLAD યોજનામાં કયા કામ કરી શકે
આ યોજના અંતર્ગત સાંસદ પોતાના મતવિસ્તારમાં માળખાગત વિકાસ કામો કરી શકે છે. જેમાં પીવાના પાણી, સ્વચ્છતાને લગતા કામો, સિંચાઇની સુવિધાઓ ઊભી કરાવી શકે છે. સ્વચ્છતા અને જાહેર આરોગ્યના કામ, ખેતી, પશુપાલન, ડેરીને લગતા કામ, રોડ, રસ્તા, પુલ, રેલવેના કામ તથા શિક્ષણ અને શહેરી વિકાસનું કામ કરી શકે છે. લોક માગણી અને વિસ્તારની જરૂરિયાત મુજબ કામોની ભલામણ
2019થી 2024ની ટર્મમાં દરેક સાંસદ પાસે 25 કરોડના બદલામાં માત્ર 17 કરોડ રૂપિયાની જોગવાઈ કરવામાં આવી હતી. એટલે ગુજરાતના 26 MPના હસ્તક 442 કરોડ રૂપિયા હતા, જે તેઓ તેમના મતક્ષેત્રમાં એવા કામો માટે વાપરી શકતા હતાં, જે કામો સ્થાનિક સ્વરાજની સંસ્થાઓ અથવા રાજ્ય સરકાર દ્વારા આયોજનમાં લીધેલા નથી. તેમાં એરિયા સ્પેસિફિક એટ્લે જે તે વિસ્તારની વિશેષ જરૂરિયાત અને મતદારોની માંગણીને ધ્યાનમાં લઈને સાંસદ કામો માટે ભલામણ કરી શકે. મળવાપાત્ર ફંડના 49.77% કામ મંજૂર
ગુજરાતના સાંસદોને કુલ 442 કરોડ ફંડ મળવાપાત્ર હતું, પણ 26 સાંસદોએ માત્ર 354.9994 કરોડ રૂપિયાના કામોની ભલામણ કરી હતી. તે પૈકી 263.15 કરોડના કામો મંજૂર કરવામાં આવ્યા હતી, અને કુલ 220 કરોડ રૂપિયા ફાળવવામાં આવ્યા હતા, જે કુલ મળવાપાત્ર ફંડ (442 કરોડ) ના માત્ર 49.77% થાય છે. ગુજરાતના MPS દ્વારા ખર્ચ સાંસદોએ માળખાગત સુવિધાને પ્રાથમિકતા આપી
ગુજરાતના MP દ્વારા રોડ, રસ્તા, પુલ વગેરે માળખાકીય સુવિધાઓને લગતા કામોને પ્રાથમિકતા આપી છે. તેમાં 114.81662 કરોડ રૂપિયાનો ખર્ચ કર્યો છે, ત્યારબાદ અન્ય જાહેર કામો માટે 71.32 કરોડ, શિક્ષણ માટે 26 કરોડનો ખર્ચ કર્યો છે, આરોગ્ય માટે 13.45 કરોડ, સૌથી ઓછો ખર્ચ હાથશાળના કારીગરોના વિકાસ માટેના માત્ર 2.948 લાખનો ખર્ચ કરવામાં આવ્યો છે. MPLAD ફંડનું એનાલિસિસ દાહોદના સાંસદે માત્ર 6.78 કરોડના કામની ભલામણ કરી
અમરેલીના સાંસદ નારણ કાછડિયા દ્વારા સૌથી વધુ, એટલે 31.2424 કરોડ ના કામોની ભલામણ કરવામાં આવી. જો કે, તેઓ માત્ર 17 કરોડ સુધીના જ કામો લઈ શકતા હતા. તેમાંથી માત્ર 9.5 કરોડ રૂપિયાનું જ ફંડ ફાળવાયુ. જ્યારે દાહોદના સાંસદ જશવંતસિંહ ભાભોર દ્વારા સૌથી ઓછા એટલે કે માત્ર 6.7803 કરોડના જ કામો માટે ભલામણ કરવામાં આવી અને 7 કરોડ રૂપિયા ફાળવવામાં આવ્યા. માહિતીનો સ્ત્રોત

https://mplads.gov.in/mplads/AuthenticatedPages/Reports/Citizen/rptExpenditureDetailsofStatewise.aspx />

http://dlvr.it/T4c3mV