મુંબઈથી બે ડ્રગ્સ સપ્લાયરની ધરપકડ:લાલગેટ મેફેડ્રોન ડ્રગ્સ કેસમાં એક આરોપી કોમ્યુટર એન્જિનિયર, પોલીસ દેખાય તો 'મહેમાન હૈ'ના કોડવર્ડ વાપરતા

લાલગેટ પોલીસે 20 જુલાઈના રોજ મેફેડ્રોન ડ્રગ્સ સાથે 3 આરોપીઓને ઝડપી પાડ્યા હતા. પોલીસે 12,57,100 રુપિયાની કિમંતનું 125.71 ગ્રામ મેફેડ્રોન ડ્રગ્સ જપ્ત કરી આ મામલે વધુ તપાસ હાથ ધરી હતી. આ ગુનામાં ડ્રગ્સ સપ્લાય કરનાર બે આરોપીઓને પણ લાલગેટ પોલીસે મુંબઈથી ઝડપી પાડ્યા છે. ઝડપાયેલા આરોપીઓમાં એક કોમ્યુટર એન્જિનિયર હોવાનું સામે આવ્યું છે. ભજીયાની લારી ઉપર ડ્રગ્સ મંગાવી વેચતા હતા
લાલગેટ પોલીસ મથક પાસેથી મળતી માહિતી મુજબ સુરતમાં લાલગેટ પોલીસની ટીમે ગત 20 જુલાઈ 2024ના રોજ મેફેડ્રોન ડ્રગ્સના જથ્થા સાથે 3 શખસોને ઝડપી પાડ્યા હતા. લાલગેટ વિસ્તારમાં હોળી બંગલા રાજકમલ બેકરીની ગલીમાં મોઈનુંદીન સલાઉદીન અંસારીની ભજીયાની લારી ઉપર ત્રણ શખસો ભેગા મળીને ચોરી છુપીથી ડ્રગ્સ મંગાવી વેચાણ કરતા હોવાની બાતમી લાલગેટ પોલીસને મળી હતી. જેને લઈને લાલગેટ પોલીસે અહી ભજીયાની લારી પાસે પાનના ગલ્લા પાસે રેઇડ કરી હતી. પોલીસે અહીંથી મોઈનુદીન સલાઉદીન અંસારી સાડીના કારખાનામાં કામ કરતા રસીદ જમાલ ઉર્ફે બનારસી ઉસ્માનગની અંસારી અને કાપડ દલાલીના વ્યવસાય સાથે સંકળાયેલા મહોમદજાફર મોહમદ સીદીક ગોડીલને ઝડપી પાડ્યા હતા. ડ્રગ્સ ભરૂચથી મંગાવવામાં આવતું હતું
પોલીસે આરોપીઓ પાસેથી 12,57,100 રુપિયાની કિમંતનું 125.71 ગ્રામ મેફેડ્રોન ડ્રગ્સ, 4 મોબાઈલ, ડિજિટલ વજન કાંટો અને નાની સાઈઝની પ્લાસ્ટિકની પુશલોક બેગ 85 નંગ મળી કુલ 13,32,200 રૂપિયાનો મુદામાલ જપ્ત કર્યો હતો. આ સમગ્ર મામલે લાલગેટ પોલીસે ગુનો નોંધી વધુ તપાસ હાથ ધરી હતી. આરોપી મોહમદ જાફર મોહમદ સીદીક ગોડીલની પૂછપરછમાં ડ્રગ્સ ભરૂચથી શેખ ઝમીર શબ્બીર મારફતે અતહર આરીફ મંસુરી પાસેથી મંગાવતો હોવાનું સામે આવ્યું હતું. જેથી પોલીસે ટીમ બનાવી આરોપી અતહર આરીફ મંસુરીને ડીટેઈન કરી આગળની કાર્યવાહી હાથ ધરી હતી. પોલીસ દેખાય તો 'મહેમાન હૈ'ના કોડવર્ડ આપતા
આરોપી અતહર આરીફ મંસુરીની પૂછપરછ દરમિયાન ડ્રગ્સ પોતે મુંબઈના અશરફ અબ્દુલ રઝાક સોખીયા પાસેથી મંગાવ્યું હોવાનું બહાર આવ્યું હતું. જેથી પોલીસે તાત્કાલિક એક ટીમ બનાવીને મુંબઈથી અશરફને પકડી પાડ્યો હતો. આમ પોલીસે ભરૂચના રહેવાસી આરોપી અતહર આરીફ મંસુરી અને મુંબઈના રહેવાસી અશરફ અબ્દુલરઝાક સોખીયાની ધરપકડ કરી હતી. આરોપી અતહર આરીફ મંસુરી કોમ્યુટર એન્જિનિયર હોવાનું સામે આવ્યું હતું. વધુમાં આરોપીઓની પૂછપરછમાં સામે આવ્યું હતું કે આરોપી અતહર મંસુરી પોતાના મિત્રો પાસેથી અલગ અલગ રકમનું રોકાણ યુ.એસ.ડી.ટી. અને ક્રિપ્ટો કરન્સીમાં કરાવતો હતો. જેમાં તેને આર્થિક નુકશાન આવતા મિત્રો વારંવાર રૂપિયાની ઉઘરાણી કરતા હતા. જેથી શોર્ટકટમાં પૈસા કમાવવા છેલ્લા છ એક માસથી MD ડ્રગ્સ વેચાણ કરવાનું નક્કી કરી તેના મુંબઇના મિત્ર અશરફ સોખિયાને પણ ત્રણ લાખ રૂપિયા લેવાના હતા. જેથી અંતહરે અશરફને મુંબઇથી કોઈ પાસેથી MD ડ્રગ્સ મેળવી અને મોકલવા જણાવેલ અને તેમાંથી જે નફો મળે તેમાંથી રૂપિયા પરત કરવાનું જણાવ્યું હતું. અશરફ સોખિયાએ મુંબઇથી સુલેમાનનો સંપર્ક કરી શકીલ મારફતે ડ્રગ્સ મેળવતો હતો અને ત્યાંથી તે પાર્સલ બનાવી કોઇપણ ખાનગી ટ્રાવેલ્સમાં ભરૂચ પાર્સલ મોકલતો હતો. અંતહર ભરૂચથી પાર્સલ મેળવી તેના મિત્ર ઝમીર શેખ મારફતે ભરૂચમાં તેમજ સુરત આરોપી મોહમદજાફર ગોડીલને સુરત આપવા આવતો હતો. વધુમાં પકડાયેલા બંને આરોપીઓ અગાઉ બે વાર ડ્રગ્સ મંગાવેલ હતું. આરોપીઓ એકબીજા સાથે વતચીતમાં 'સામાન' જોઇએ છીએ ના કોડવર્ડમાં વાતચીત કરતા હતા. તેમજ ડિલિવરી કરતી વખતે રસ્તામાં કે નજીકમાં પોલીસ દેખાય તો 'મહેમાન હૈ'ના કોડવર્ડ આપતા હતા. ઊંડાણપૂર્વક તપાસ કરવામાં આવશે
આ બનાવ અંગે ડીસીપી પીનાકીન પરમારએ જણાવ્યું હતું કે ગત 2 જુલાઈના રોજ લાલગેટ પોલીસે 125.71 ગ્રામ મેફેડ્રોન ડ્રગ્સ જપ્ત કરી 3 આરોપીઓની ધરપકડ કરવામાં આવી હતી. આરોપીઓની પૂછપરછ દરમિયાન આરોપીઓ આ ડ્રગ્સ ભરૂચથી લાવેલા હતા તેવી માહિતી મળી હતી. જેના આધારે લાલગેટ પોલીસે ભરૂચમાંથી અતહર આરીફ મંસુરીની અટકાયત કરવામાં આવી હતી. અંતહર આરીફ મંસુરી સુરતમાં લાલગેટમાં આરોપીઓને એમડી ડ્રગ્સ સપ્લાય કરતો હતો. અંતહર આરીફ મંસુરીની ધરપકડ કર્યા બાદ પૂછપરછમાં તે એમડી ડ્રગ્સ મુંબઈના અશરફ અબ્દુલરઝાક સોખીયા પાસેથી લાવ્યો હોવાનું સામે આવ્યું હતું. જેથી લાલગેટ પોલીસની ટીમે મુંબઈમાંથી તેની પણ ધરપકડ કરી હતી. અશરફ અબ્દુલરઝાક સોખીયા એમડી ડ્રગ્સ ક્યાંથી લાવે છે તેની પણ તપાસ કરવામાં આવશે. તેમજ આ અગાઉ લાલગેટમાંથી 3 આરોપીઓ ઝડપાયા હતા. તે ડ્રગ્સ કોને કોને વેચતા હતા તેની પણ ઊંડાણપૂર્વક તપાસ કરવામાં આવશે.


http://dlvr.it/T9z7zM