સૌરાષ્ટ્ર અને દક્ષિણ ગુજરાતમાં રેડ એલર્ટ:અમદાવાદ શહેરમાં મોડી રાતે ગાજવીજ સાથે ભારે વરસાદ; દ્વારકા, જામનગર અને વલસાડમાં ભારેથી અતિભારે વરસાદની આગાહી
હવામાન વિભાગ દ્વારા 25 જૂનના રોજ રાત્રે 1 વાગ્યાના જાહેર કરાયેલા બુલેટિન અનુસાર આગામી 3 કલાક મધ્યમથી ભારે વરસાદની આગાહી છે. આ સાથે 40 કિમી પ્રતિ કલાકની ઝડપે પવન ફૂંકાવાની પણ શક્યતા વ્યક્ત કરવામાં આવી છે. અમદાવાદ, મહેસાણા, ગાંધીનગર, મહિસાગર, સાબરકાંઠા, અરવલ્લી, દાહોદ, પંચમહાલ, ખેડામાં રાત્રિ દરમિયાન 3-4 કલાક સુધી ધોધમાર વરસાદ પડવાની આગાહી હવામાન વિભાગ દ્વારા રાત્રે 1 વાગ્યે બહાર પડાયેલા બુલેટિનમાં કરવામાં આવી છે. ગુજરાત રાજ્યના આણંદ, સુરેન્દ્રનગર, ભાવનગર, છોટા ઉદેપુર, વડોદરા, નર્મદા, સુરત, નવસારી જિલ્લામાં પણ રાત્રિ દરમિયાન આગામી 3 કલાકમાં મધ્યમથી ભારે વરસાદની સંભાવના હવામાન વિભાગે વ્યક્ત કરી છે. આખરે મેઘો મંડાણો
આ વર્ષે ચોમાસું ગુજરાતમાં પ્રવેશ્યા બાદ નવસારીમાં અટવાઈ ગયું હતું, જે હવે સૌરાષ્ટ્ર તરફ આગળ વધી રહ્યું છે. એને કારણે સૌરાષ્ટ્રના ખેડૂતો માટે સારા સમાચાર સામે આવ્યા છે. હવે દક્ષિણ ગુજરાતની સાથે સૌરાષ્ટ્રમાં પણ ચોમાસુ અસલી રંગમાં જોવા મળી રહ્યું છે. આજે વહેલી સવારથી જ રાજ્યના અનેક જિલ્લામાં મેઘરાજા હેત વરસાવી રહ્યા છે. ત્યારે હવામાન વિભાગે સૌરાષ્ટ્રના દ્વારકા, જામનગર અને દક્ષિણ ગુજરાતના વલસાડ જિલ્લામાં રેડ એલર્ટ આપ્યું છે. આજે સવારે 6 વાગ્યાથી સાંજે 8 વાગ્યા સુધીમાં રાજ્યના 104 તાલુકામાં વરસાદે હાજરી પુરાવી હતી. તો સાંજે 6 વાગ્યાથી 8 વાગ્યા સુધી રાજ્યના 7 તાલુકાઓમાં વરસાદ નોંધાયો હતો. જામનગરના કાલાવડ તાલુકામાં ધોધમાર વરસાદના પગલે મૂળીલા પાસે પુલમાં ગાબડું પડતાં વાહનચાલકો મુશ્કેલીમાં મુકાયા હતા. બરવાળાના ચોકડી ગામે વીજળી પડતાં એક યુવાનનું મોત થયું હતું.
http://dlvr.it/T8jfVj
Comments
Post a Comment