પાટણ જિલ્લાનાં તાલુકા મથકેથી જ જે તે તાલુકાની મામલતદાર કચેરી ખાતેથી જ હવે જન્મ અને મરણની વિલંબિત નોંધણીનાં હુકમો મળી શકશે તેવી વ્યવસ્થા પાટણ જિલ્લા મેજિસ્ટ્રેટ વ કલેકટરે ગોઠવતાં જન્મ અને મરણનો વિલંબિત નોધણીનાં હુકમો માટે કોર્ટના ધક્કા ખાવા નહિ પડે. જે તે તાલુકા સ્તરેથી તેઓને જન્મ-મરણ નોંધણીનાં હુકમો મળી શકશે. અત્યાર સુધીની વ્યવસ્થા પ્રમાણે પાટણ જિલ્લાના શહેરી અને ગ્રામ્ય વિસ્તારોમાં જન્મતા કે મૃત્યુ પામેલા લોકોની સમયસર નોંધણી ન કરાવી શકેલા પરિવારો તેમનાં જન્મેલા કે નિધન પામેલાઓનાં જન્મ-મરણની નોંધણી માટેનાં ઓર્ડર જે તે તાલુકાનાં કાર્યક્ષેત્રની અદાલતોમાથી હુકમો મેળવીને જન્મ-મરણ નોંધણી કચેરીમાં રજૂ કરવા પડતા હતા તે ત્યારબાદ નોંધણી કરવાની વ્યવસ્થા છે. આ વ્યવસ્થાનું અગાઉ વિસ્તરણ કરીને કોર્ટ ઉપરાંત પાટણ જિલ્લાનાં વિવિધ તાલુકા સ્તરનાં સબડિવિઝનલ મેજિસ્ટ્રેટ વ પ્રાંત અધિકારીઓને આ પ્રકારના હુકમો આપવાની સત્તા પાટણ કલેક્ટરે સોંપી હતી. પરંતુ પાટણ જિલ્લાનાં પ્રાંત અધિકારીઓ પર વિવિધ કામગીરીઓનું ભારણ વધારે હોવાથી તેઓની રજૂઆતો બાદ પાટણ જિલ્લા કલેક્ટરે આ પ્રકારની વિલંબીત જન્મ-મરણની નોંધણી માટેનાં હુકમોની સત્તા પાટણ તાલુકા શહેરી મામલતદારોને સુપ્રત કરી છે. કલેક્ટરનાં આ હુકમથી પાટણ શહેર જેવા જિલ્લા મથકનાં અને તાલુકાનાં લોકોને વધારે ફાયદો થશે. કારણ કે, સૌથી વધારે જન્મ-મરણની નોંધણી પાટણ નગરપાલિકાની રજિસ્ટ્રાર કચેરીમાં થતી હોય છે ને એનાં વિલંબિત નોંધણીનાં હુકમો મેળવવા માટેની પાટણ મામલતદાર કચેરી પણ નગરપાલિકાની પાસે જ હોવાથી લોકોને સરળતા રહેશે. પાટણ જિલ્લા કલેક્ટરે પાટણ જિલ્લાનાં એકઝીક્યુટીવ મેજિસ્ટ્રેટ વ મામલતદારોને આ સત્તા આપતાં તા. 16-5-2024 નાં હુકમમાં જણાવ્યું છે કે, જન્મ-મરણ નોંધણી (સુધારો) એક્ટ-2023 અન્વયે જણાવેલી સત્તાઓ સુપ્રત કરવાની થતી હોવાથી ભારત સરકારનાં કાયદા અને ન્યાય મંત્રાલય (લેજીસ્ટેટિવ ડિપાર્ટમેન્ટ) દ્વારા પ્રસિધ્ધ થયેલ જન્મ-મરણ નોંધણી સુધારા એક્ટ-2023 તા. 11-8-2023 થી મળેલી સત્તાની રૂએ પાટણ જિલ્લામાં જ્યાં જન્મ અને મરણ થાય તે વિસ્તાર પર અધિકાર ક્ષેત્ર ધરાવતા તમામ મામલતદાર અને એક્ઝીક્યુટીવ મેજિસ્ટ્રેટને આ સુધાર અધિનિયમ મુજબ જન્મ-મરણની નોંધણી બાબતે નિયમાનુસાર કાર્યવાહી કરવામાં આવ્યાં છે. તેવું પાટણ જિલ્લા કલેક્ટર વ જિલ્લા મેજિસ્ટ્રેટ અરવિંદ વિજયને પોતાનાં હુકમમાં જણાવ્યું છે.
http://dlvr.it/T7XR6C
Comments
Post a Comment