હીટ વેવની આગાહીના પગલે ગાંધીનગર જિલ્લા કલેક્ટર મેહુલ દવે આવશ્યક તમામ પગલાં ભરવા જિલ્લા વહીવટી તંત્રને સૂચના આપી છે. જેના પગલે સોમવારથી લોકોને ગરમીમાં રાહત મળે અને વહીવટી કામ સરળતાથી થઈ શકે તેવા ઉમદા આશયથી ગાંધીનગર જિલ્લામાં તમામ તાલુકા અને કલેકટર કચેરીના જન સેવા કેન્દ્રનો સમય સવારના 9:30 વાગ્યાથી કરવામાં આવ્યો છે. જ્યારે કોર્પોરેશન વિસ્તારમાં પણ વિવિધ સ્થળોએ મંડપ - પાણીની સુવિધાઓ ઉભી કરવામાં આવશે. સમગ્ર રાજ્યમાં આ વર્ષે ઉનાળાની ગરમીએ રેકોર્ડ બ્રેક કર્યો હોય તે પ્રકારે આકાશમાંથી અગનવર્ષા વરસી રહી છે. ત્યારે ગરમીનો પારો ગુરુવારે 46 અને શુક્રવારે 45.5 ડિગ્રીએ પહોંચી જતા સીઝનના સૌથી ગરમ દિવસનો અનુભવ નગરજનોને કરવો પડયો હતો. એજ રીતે આજે પણ આકરી ગરમીમાં નગરજનો શેકાયા હતા. વૈશાખ માસના પ્રારંભથી ઉનાળાની મોસમની ગરમી આક્રમક બની હોય એ પ્રકારે તાપમાનના પારામાં દિનપ્રતિદિન વધારો થવાથી કાળઝાળ ગરમીમાં લોકો પરસેવે રેબઝેબ થઇ રહ્યા છે.તાપમાનમા વધારો થવાથી છેલ્લા ઘણા દિવસથી કાળઝાળ ગરમીનો સામનો લોકો કરી રહ્યા છે જેનાં પગલે જિલ્લા કલેક્ટરે મ્યુનિસિપલ કમિશનર જે. એન. વાઘેલા સાથે આ સંદર્ભે બેઠક કરી હતી. એટલું જ નહિ તેમણે ગાંધીનગર શહેરના જુદા જુદા વિસ્તારોની મુલાકાત પણ લીધી હતી. લોકોને સૂર્યના સીધા કિરણોથી રક્ષણ અને ગરમીમાં રાહત મળે એ માટે ગાંધીનગરના મહત્વના વિવિધ સ્થળોએ કોર્પોરેશન દ્વારા મંડપ બાંધવા તેમજ પીવાના પાણીની સ્થળ પર જ સુવિધા ઉભી કરવા નક્કી કરાયું છે. ગાંધીનગર મહાનગરપાલિકા દ્વારા પણ ઉષ્મા લહેરના સામના માટે વિવિધ પગલાં ભરવામાં આવ્યા છે.અત્રે ઉલ્લેખનીય છે કે હીટ વેવના પગલે શ્રમિકો કામ કરતા હોય એવી તમામ સાઈટ પર બપોરના બાર વાગ્યાથી સાંજના ચાર વાગ્યા સુધી કામ બંધ રાખવા, જિલ્લામાં આંગણવાડીનો સમય સવારના સાતથી દસ વાગ્યા સુધીનો રાખવા, જિલ્લાના અંતરિયાળ વિસ્તારોમાં લૂ લાગવાના કિસ્સામાં ઝડપથી આરોગ્ય સેવા મળી રહે તે માટે ધનવંતરી રથ મોકલવા જેવા આવશ્યક પગલાં પણ વહીવટી તંત્ર દ્વારા લેવામાં આવ્યા છે.
http://dlvr.it/T7Nw62
Comments
Post a Comment